Manifesto | < تُريدونَ عَبَثاً، خُذُوا! > (1)


زياد الرحباني

(دارج) قدّ ما يكون عِندَك خيال، بيضلّو التاريخ يفاجئك. (أينشتاين)

■ ■ ■

(دارج) ـــ شو هيدا ولوه؟ هلّق إنّو شو عِمِل الجيش بصيدا وعبرا والتعمير؟
ـــ وفَّرْ شُغِل عالحِزِب!! (وعم يضحك وسعيد).
ـــ الحزب؟ أيّا حزب يعني؟
ـــ الحزب اللي معو سلاح غير شرعي... طبعاً...
ـــ آه حزب الله... بس أنا شفتُنْ عالمشرفيّة، كانوا مبسوطين.
ـــ كلّنا مبسوطين، ما عم قلّك وفَّر عليهن الجيش، في أحلى منّو الجيش بحياة إختك بس يوفّر عليهن وعلينا؟
ـــ طبعاً لأ... الجيش هوّي الأساس.
ـــ إنتَ إيمتا بدّك تعرّفني عا إختَك؟

■ ■ ■

شو هوّي اللي بينضفلو وبينْنَّقَع بـ:
1ـــ خلّ أبيض/ 2 ـــ زيت زيتون/ 3ـــ فليفلة خضرا مقطَّعة صغير/ 4ـــ حامض مفروم مع قشرو/ وبيصير أطيب؟
الجواب غداً... أو قبل (نحوي) لمَن استطاع إلى ذلك سبيلا! الاتصال بـ«الأخبار» على الرقم: 01/759500 ـــ ext: 105

■ ■ ■

(دارج) ـــ دخلك شو الفرق بين نَسْف المنازل و«نَزْف» المنازل؟
ـــ في فرق أكيد، في تلات فروقات:
1 ـــ معناهُن نفس الشي.
2 ـــ الفرق بين إنّو نسْف هيّي الواقع وفعلاً حَصَلْ... أمّا «نَزْف» فهيّي من ابتكار خيال بعض المتنوّرين من الأدبا والنُقّاد أو المسؤولين السياسيّين أو الشخصيّات «الطاهرة» الدينيّة واللي لأوّل وهلة بتخلّلي المستمع اللي مقابيلك يفكّرك عم تقرط بحرف السين! (وهيدا شي نادر).
3 ـــ نسف بتنكتب وحدها، أمّا نزف فلازم وأصولاً ولغويّاً وكتابةً تحطّلّها «...» لمَا يفكّر أجنبي مثلاً عم يدرس لغة عربيّة، إنّو نزف هيّي الكلمة الصحيحة مش نَسْف!! يعني لبكة عا بعضها.. إنّو ما البيت بالنهاية بتِنْسفو مش: بتنزفو!!!

■ ■ ■

سَبَق السيفُ العَذْلَ وسَبَقَ الفَضْلُ الأسيرْ
قَدْ أُعِطيَ فُرْصَةَ عمْرِه لكنَّهُ جَاءَ أخيرْ

ابتداءً من تاريخ 30 تموز 2015، تم إيقاف التعليقات على المقالات مؤقتاً نظراً لبعض الصعوبات والتعديلات التقنية، يمكنكم التعليق وإبداء الرأي والتواصل مع الكتاب عبر صفحتنا الالكترونية على

فايسبوك ( https://www.facebook.com/AlakhbarNews)، أو عبر البريد الالكتروني: [email protected]